"Jaane Kab Koi Zarurat Mujhe Ruswa Kar De......"

Zindagi Kab Mere Pindaar Ka Sauda Kar De,
Jaane Kab Koi Zarurat Mujhe Ruswa Kar De.

Kab Uda Kar Mujhe Le Jaye Hawa Door KahiN,
AasmaN Kab Meri Hijrat Ka Ishara Kar De.

Dushmani Maar Na De Jaan Se Barhtey Barhtey,
Dosti Jeeney Ka Mujhse Na Taqaza Kar De.

Bheed Mein Khainch Ke Le Jaye Meri Tanhaayi,
Meri Wahshat Mujhe Phir Bheed Mein Tanha Kar De.

Hai Har Ek Shakhs Ke HontoN Pe Guzarish Paiham,
Mere Maula Mere Haalat Ko Achcha Kar De.

Dil Se Nikli Hui Ek Aah Mita De Mujhko,
Ek Tapka Hua Aansu Mera Charcha Kar De...